بلاد الموازي
بلاد فيها الطّايح مرفوع
و الواقف بالخلاف يوفّي بلاصة
بلاد فيها المخبّي شفّاف
و الشّرعي سهم اللحّاسة
بلاد الموازي
بين كرّ و فرّ, الشّبيبة القدّام
و الشّيبة تقبض في الكاسة
بلاد الإعلام وسيلة
و العدل جرّتو نكّاسة
بلاد الموازي
بلاد الحكومة و الكراسي
المستقلّين في القدر تساسي
و الشعب في موّال "ماني ناسي"
عزاه على قلبو, يقاسي
بلاد الموازي
مجلسو مفتوح للبرّاني يحكم
و المنسحبين ما لقاو شكون يدعم
الكيل و الويل ليل مع صباح
و الدلّالة في السوق تبرعم
بين الصورة و السورة
تشوف و تقرى كان "صلعم"
بلاد الموازي
سيّبو المجرّمة و جابر في الحبس يقاسي
إلّي غنّى عالبوليس ما لقى شكون يواسي
و إلّي رمى العضمة عالكلب مباصي
بلاد الموازي
تحت سنّ الرّشد يسكتو عليك
تدفع الغالي حتّى من دمّ عينيك
تقسم معانا و الوباء فيك
العزاء مالوش خطّ أرتيستيك
خاطر في بلاد الموازي
إلّي ليك ليك و إلّي خاطيك متاعهم
تقبل الصّفقة كيما كتبوها أتباعهم
و تموت بغصّتك تتصكّك
لا عين ترى و لا قلب يوجع
لين ينصبولك ستاتي "للحريّة"
جماعة الّي فداوك كبش ضحيّة
يكسبو بيك و بقضيّتك الشّرعيّة
و يدخلو يكوّرو هوما زادة مع البقيّة
في بلاد الموازي
سيّب العزاء, خلّي يموت الكازي
