من أنتم ؟

النَاس إلي يغنَيو في غناية الشَعب و الثَورة و الأصل و المفصل و لغة توَة الكفاح و نغمة كلاونا و موَال يا هل ترى يرجعون أحباب قلبي. شكونهم؟

نفس النَاس إلَي يصولو و يجولو في البلاد التَونسيَة و في غيرها مالبلدان , يعيَطو و يصيحو إلَي الثَورة متاعهم, إلَي هوما عملوها و إلَي فلان و فلتان ركبو و إلَا يحضَرو في رواحهم بش يركبو عليها.

وين كانو النَاس هاذوما ؟ وين كانو مدَة 23 سنة و حتَى أكثر؟ أنا مانيش نطالب فيهم بش يقدَمو بطاقة دخول كيف إلَي كنَا نستعملوهم في المعاهد و إلا بش يعبَرو وقتلَي هوما كانو في كروش امَاهاتهم. أنا نتساءل وين كانو راكشين هالأربعة و إلا الخمسة سنين إلَي تعدَاو. اش عملو للبلاد و إلا لسكَان البلاد؟ أشنيَة الشَرعية إلي تخلَيهم ينصرو فلان و يخوَنو فلتان؟ بالطبيعة كلمة الشَرعيَة ما عندهاش شرعيَة في حدَ ذاتها و لذا هات خلَي نشلَكوها هيَ زادة.

شكونهم هاذوما المحروقين على بلادهم؟ أشكونهم إلي يتبخترو و يورَيو فينا في قدَهم الميَاس؟ إلي يخدمو في و مع السَفارات؟ إلَي ينسَقومع المناضلين و شبه المناضلين؟ إلي يصرفو على الكلمة و العيشة و الكرامة و الخبزة من حق الزوَالي ؟ إلي في كل محضر يحضرو و ديما في الموعد ... أمَا وراء الحاسوب متاعهم و إلَا على فردة بنك وإلَا في تيراس متع قهوة مالقهاوي. الثَورة وليدة القهوة؟ هاو في بالي.

أشكونهم إلَي تولدو بمغارف ذهب في أفَامهم؟ إلَي لا تعبو لا سهرو و لا خدمو و جايين يقدَمو في خدماتهم للثَورة؟ ألَي متبرَين مالكلَ و مستبنين القانون و دولة القانون؟ إلي صرفو على رواحهم و صرفت عليهم تونس؟ أشعب الطفيلي و أخواته و إلَي يتمسكنو و يتقفطنو و يبكيو على مرارة العيشة و اللَقمة الصعيبة و فلان إلَي عطاه ربي و نحَالو من فمَو هوَ؟ إلَي ما عندوش همَة و ياكل في صحن إلَي يسوى و ما يسواش و يغنَي في موَال ''أنا مش كافر بس الجوع كافر''؟ إلَي يصولو و يجولو و يمدحو في الأقطاب؟

نحبَ نهار نعرف كيفاش يرقدو النَاس هاذوما و يغمَضو عينيهم و يعطيوها خميري من غير ترميشة؟ كيفاش يقومو الصَباح و شنوَة يفطرو. زعمة قلمهم فطيرة حافية و إلَا عظمة في الزَبدة؟ كايك و كرواسون و إلَا عصير غلال الجنَة و ديما يمشي؟ و القهوة في راس النَهج؟ و الفطور؟ و البصَة؟ ناتنة و إلَا بلاش ريحة؟ و الخرية جارية و إلَا عندهم القبض؟ زعمة يحكَو سنَيهم؟

نحكي على إلَي يقولو ''حوت ياكل حوت'' و ''الصَوف تتباع بالرَزانة'' . باللَاهي قولولي لأشكون تبيعو فيها الصَوف؟ و في أنا سوق؟ تعملو تخفيضات؟ تعرفوه قانون السَوق؟ و إلَا زعام كان في قانون الغاب؟ وجماعة الفوضى الخلَاقة و الفنَ و الثَقافة. هاو ريحتو طلعت الفنَ متاعكم حتَى ولَينا ناكلو فيه. العفن.

إلَي يلعب عالكلام و على الطنبور و بالكذا. إلَي يبندر و إلَي يشطح و إلَي ما ززَاتوش البطحة ... وطلع للسَطح. إلَي يغرم و إلَي يغرف و ما يعرفش إلَي ماناش الكلَ أولاد تسعة شهور. أشكونهم؟ أشكونكم؟